ঘরে গিয়া ফুতিফানি পটিয়া মোরে কাম আহান করেদিস ইমা। অরে বারনগর তলে মিসসিরি সাংকরানির বানুকহান আসে অহান ফুংকাহার জিগত গাতিয়া থদে। হবা ইয়া চঙাহান ইলে দিস। মি আজি মুহি এগরেউ তোর দেখি চুনা করে মিসসিরি সাংকরেদেং করে! হিঞ্চাপির মনে হারৌ বলক বলক সৌয়র। তেই হারৌহান গুরে নারিয়া হা হা হা হা হা করিয়া আহানি অকরল। মানুয়ৌ আগ দুগ আহিয়া জমলাগা আপাঙগাসির ঘরে। এমতাগার আহানির খঙচেল এগ হুনিয়াতে হাবিয়ে হারপাউবেল্লা এগ সাধারণ মানুজেলাগ নাবে হিঞ্চাপিগহে সইনেই! তবু কিহানতে করানি উপায়ৌ নেই। কালিও সিয়ানে হাবিরে যেসারে বুঝিয়া মাতিসে তাঙিয়ৌ অসাদেই প্রস্তুত ইয়া আসি। এগদে বানুকহান চঙাহান করল মালকে। গাঙর গাউরাপুয়া হাবি জনে জনে বানুক, দড়ি, কদাল, দা যেগই যেতা পারতারা লগে আনিয়া লুকিয়া থসি সুবিধামতো। হিঞ্চাপি এগ বাসা নারিয়া উঠানে ফিদাত বহিসিলি এগ উঠলি। বারো কান্নামর ডামহাৎ চিৎগ ইয়া পড়লিগা। সিয়ানে মাতের, - মুহি, অহাতই থাক পড়িয়া। এপাগাই মিসসিরি সাংকরে দেউরি। খানি মানি চিকচাক আহান ইমে করতই। নাতে লরিসকো! লরলে গেলগা ! অহ! লরলেতে কিহান ইতইথাং? – লরলেতে ইমে হাই ক্ষতি অর!