ভূমিকা
লোকয়ারি এতারে আমি আকসাটে ‘ববেইর য়ারি' বুলে পারিয়ার। বিমল সিংহ গিরকে ‘ববেইর য়ারি’ বুলিয়া লোকসাহিত্যর য়ারি এতা খমকরেসে। ববেই শব্দ এগ সম্ভবত ‘বপাবপি' শব্দত্ত আহেসেগ। ‘বপা'র বহুবচন ওয়াহিগ ‘বপেই’; ‘বপেই’ত্ত ‘ববেই’ অলসে (যেসাদে মইলক বহুবচনে মৌয়েই, বহকেত্ত অর বৌয়েই উসাদে)। অন্যবেদে ‘ববেই’ বুলিয়া দৌ আকতার কল্পনা করিয়ার। উতা দৌ অসি বপাবপি বুলিয়া চিন্তা করানি য়াকরের। আগেদে নিয়ম আহান আসিল যে শৌ আগর দাত বাগের উবাকা মুঙেদে মুঙহান দিয়া গরর চুরিতলে উবায়া পিঠিহান নাচেয়া চালর গজেদে দাতগ উরাদিয়া ববেইরাং কাৎকরানি- ‘ববেইরো ববেই, মোর বাগা দাত এগ নিয়া তোর হবা দাত উগ দে।' দাত উগ ববেইরাং কাৎকরলে হবা দাত তেল্লাম উঠের বুলিয়া লোকবিশ্বাস আহান আসিল বারো এবাকাউ এ বিশ্বাস এহান নানান লয়াত থানার য়ামপা সম্ভাবনা আসে।
বিষ্ণুপ্রিয়া মণিপুরি এতা য়াম রসিক, আবেগয়ৌপা, কল্পনাথুম্পা, য়ারিউল্পা জাত আহান। তানুর মারেয়ে মারেয়ে, মিহুলে মিহুলে বুদ্ধিচৌখাৎ, লৌশিংগা বারো হাকথেংপা রসিক মনর পরিচয় পেয়ার।
ফরাসি নৃতাত্ত্বিক গবেষক Odette Loyen du Puigaudeau- এ লোকয়ারির বিষয়ে এসাদে মাতেসে - ' A substantial body of folktales is more than the literary expression of people. It is in a very real sense, their ethnography, which is systematised by the student, gives a penetrating picture of their way of life' অসমিয়া সাহিত্যিক সাহিত্যরথী লক্ষ্মীনাথ বেজবরুয়া গিরকে লোকসাহিত্যরে জাত আহানর ‘আত্মজীবনচরিত' বুলিয়া আখ্যা দেসে। জাত আহানর জাতীয় জীবনর মৌখিক ইতিহাস পেইক বুল্লে যেসাদে ‘ফিলোলজি' অর্থাৎ ভাষাতত্ত্ব বারো ‘মাইথোলজি' অর্থাৎ পুরাতত্ত্ব হারপানি থকর ঠিক উসাদে লোকসাহিত্যউ হারপানির প্রয়োজন আসে- এহানরে অস্বীকার করানির উপায় নেই। জার্মান পণ্ডিতদাপাই দেহুয়াদেসি জাত আহানর পুরানা বা মৌখিক য়ারির ইতিহাস বারো ভাষা আহানর শব্দর ইতিহাস বিরাট যুদ্ধ আহানর ইতিহাসেত্ত জিঙে য়াম মূল্যবান।
বিষ্ণুপ্রিয়া মণিপুরি লোকসাহিত্যর বেদে আকখুরুম আহিগি বুলেইলেই গজর কথাচুটি কতিহান চুম উহান উপনি য়াকরের। এ ভাষার লোকসাহিত্যই এ জাত এহানরে আর জাতরাং বিলীন অনা নাদিয়া একগোট বারো তঙাল অয়া থানার পাংকাল যুগাসে। মাতানি য়াকরের এরে লোকসাহিত্যরমা ইতু অয়া আসে জাত এহানর মামুলি জনজীবনর সামাজিক বারো ধর্মীয় বিবর্তনর ইতিহাস আহান ।
ববেইর য়ারি বা লোকয়ারি এতা দলগত রচনা। কতশত বসর আগে কুনো অজ্ঞাত মানু আগই বা কত্তগই সহজভাবে মনর সরল ভাব উহান, নিজর বিশ্বাস উহান ফংকরানিরকা এতা লেংকরেসি যেতা বহু ধারানালা আটিয়া এবাকার প্রজন্মরাং আয়া ফৌয়সেগা। এতা মানুর অন্তরে এবাকাউ জিংতায়া আসে। এতার অধিকারহান পুল্লাপ জাত আহানরাং থার। এতার লগে আরাক আকতাই জাত আহানর পরম্পরারে জিংতা করিয়া থর- উতা অইলতাই এলা বারো গাথা, কূটাভাস বারো পৌরেই যেতা হাবিরে পুল্লাপে মাতিয়ার লোকসাহিত্য বা ফোকলোর।
ইন্দো-বাংলা বিষ্ণুপ্রিয়া মণিপুরি এসোসিয়েশন (আইবিবিএমএ)-র আর্থিক ব্যবস্থাপনাত বারো সুশীলকুমার সিংহ গিরকর সম্পাদনাত ‘বপাবপেইর য়ারি' নাঙে পুল্লাপ বিষ্ণুপ্রিয়া মণিপুরি লোকয়ারির যে সংকলনহান পৌরিত্ত প্রকাশ অর এহান ঐতিহাসিক কাকেই আহান। লেরিক এহানে বিষ্ণুপ্রিয়া মণিপুরি জাত এহানরে নামরিল হজক যুগেইতই।