সম্পাদকর কথা আকচুটি
লোকসাহিত্যর অন্যতম জনপ্রিয় ধারা আহান ইলতা লোককথা বা লোকয়ারি -যেতারে আমার ঠারে ‘ববেইর য়ারি বা ‘বপাবপেইর য়ারি’ বুলরাং। এরে য়ারি এতা মানুর থতাৎত থতাৎ সিতারিয়া আহেরতা থাইনাকার সময়েৎত। য়ারি এতার লেপ্পা কুনো লেখক নেই। সময়হান অঙনির লগে লগে লোকয়ারি আহানর কাহিনিহানৌ অঙর বারো সংযোজন বিয়োজন ইয়া প্রজন্ম আহাৎত আরাক প্রজন্ম আহাৎ সিলর। এ কারণ এহানে লোকয়ারি আহানর কত্তহান সংস্করণ আমি পারাংতা।
বিষ্ণুপ্রিয়া মণিপুরি লোকয়ারির চেম্ফুগ এমাটিক সলগ নাগই। আমার হুরকাং সমাজ এহাৎ আবকচা লোকয়ারি মানুর থতাৎ থতাৎ প্রচলিত আসিলতা। কিন্তু কালর করাল হুৎগৎ পড়িয়া বারো আমার উদাসীনতা অবহেলার কারণে আবকচা লোকয়ারি লেইমাং ইয়া গেলগা। ত্রিপুরার প্রয়াত মন্ত্ৰী, বহুমুখী প্রতিভার অধিকারী ডাঙরিয়া বিমল সিংহ গিরকে লোকয়ারি খমকরানির কাম এহাৎ পথিকৃৎগর ভূমিকা পালন করিসিল বুলে পাররাং। গিরকে ভারত-বাংলাদেশর আমার সমাজর লয়াৎ লয়াৎ প্রচলিত আসিল বপাবপেইর য়ারি বা ববেইর য়ারি অতা খমকরিয়া লেরিকহান করে প্রকাশ করিসিল, লেরিক অহানর নাঙহান ‘ববেইর য়ারি’। বিমল গিরকর দেহাদেহি পিসেদে দুগ আগ লেখকে আমার লোকয়ারি খমকরিয়া লেরিক প্রকাশ করিসি। ঔ লেখক অতার মাঝে লক্ষ্মণবাবু সিংহ, দিল্স লক্ষ্মীন্দ্র সিংহ, প্রভাসকান্তি সিংহ প্রমুখ গিরকগাসির নাঙ ধরে পাররাং।
আমার লোকয়ারি এতার জনপ্রিয়তাহান সুপ না কমিসে বুলিয়া নিংকরুরি। আমার শৌ বারো শৌর অভিভাবকে আমার লোকয়ারির লেরিক বিসারতারা আমার লেরিকর স্টলে আহিয়া। বিমল সিংহ গিরকর ‘ববেইর য়ারী' লেরিক অহানৌ এপাগা দুষ্প্রাপ্য। অহানে আমার লোকয়ারি অতা খমকরিয়া সংকলন আহান প্রকাশ করানির থৌরাঙ নিলাংগাতা। লেরিক এহান প্রকাশর ক্ষেত্রৎ যে গিরকগর ভূমিকাহান হাবিত্ত বপ- ঔ গিরক অগ ইলতা কোলকাতাবাসী সন্তোষকুমার সিংহ গিরক, আইবিবিএমএ-র সমন্বয়কগ। গিরকে বারে বারে থৌকরানিয়ে লেরিক এহান ফঙকরানিহান ত্বরা ইলতা। মি সন্তোষ গিরকরে নিয়ামপারা বানানুংশি হারপুয়াউরি। লেরিক এহান প্রকাশ করতে রুপাপইসা বারো পরামর্শ দিয়া মোরে পাংলাক করলা গিরিগিথানির মাঝে ব্রহ্মানন্দ সিংহ, দুবাইপ্রবাসী বিজিৎ শর্মা, পৌরির সভাপতি ডা. সুকুমার সিংহ বিমল, সন্তোষকুমার সিংহ, কবি সন্তোষ সিংহ, কবি কাঞ্চনবরণ সিংহ, ডা. শরদিন্দুকান্তি সিংহ, কবি অপর্ণা সিংহ, রুহিজিৎ সিংহ, কল্পনীল সিংহ প্রমুখরে মি কৃতজ্ঞতা হারপুয়াউরি। মুম্বাইর বিষ্ণুপ্রিয়া মণিপুরি কল্যাণ সমিতির সদস্য হাবির প্রতিয়ৌ মি কৃতজ্ঞ তাঙর আর্থিক পাংলাকরকা ।
সংকলন এহাৎ বিমল সিংহ গিরকর ‘ববেইর য়ারী লেরিক অহানর আবকচা য়ারি য়ৌকরানি ইসে। এহান বাদেউ লক্ষ্মণবাবু সিংহ গিরকর ‘বিষ্ণুপ্রিয়া মণিপুরীর য়ারী', প্রভাসকান্তি সিংহ গিরকর 'য়ারির ঝাকা', কাঞ্চনবরণ সিংহ সম্পাদিত ‘জগৎমোহন সিংহ রচনাসংগ্রহ, স্মৃতিকুমার সিংহ গিরকর 'নামরিল হজক বিসারেয়া' বারো শিলচরর 'পঞ্চশ্রী' পত্রিকাতৌ য়ারি খমকরানি ইসে । ব্রজেন্দ্রকুমার সিংহ গিরকর 'মাদই সরারেলর য়ারি' অহান মহাসভার বিশ্ব সম্মেলনর স্মরণিকাৎ প্রকাশ ইসে 'বরন ডাহানির এলা' নাঙর লেখা অহাৎত ভূমিকা অংশ অহান সেচাদিয়া য়ারি অংশ অহান য়ৌকরানি ইল। জর্জ আব্রাহাম গ্রিয়ারসনর খমকরা য়ারি অহান লিঙ্গুইস্টিক সার্ভে অফ ইন্ডিয়ার পঞ্চম খণ্ডৎত তুলানি ইসে।
সংকলন এহানর য়ারি এতা মৌলিক য়ারি নাগই। য়ারি অতা পুনর্কথিত বা পুনর্নির্মিত ইসেতা বিভিন্ন লেখকর আতে। যে যে গিরিগিথানিয়ে তাঙর খমকরা পুনর্কথিত বা পুনর্নির্মিত লোকয়ারি অতা দিয়া সংকলনহান বুজ্জিল-বরা করানি পাংকরলা— তাঙি হাবিরে মি হৃদিয়ৌপা কৃতজ্ঞতা হারপুয়াউরি। নিয়াম ব্যস্ততার হাদিতৌ সংকলন এহানর চুনাপা প্রচ্ছদ আগ বারো গল্পহান লেহে স্কেচ আকেইগ য়েক্করে দিল খ্যাতিমান চিত্রশিল্পী শক্তিকুমার সিংহ গিরকে। গিরকরেউ মি হৃদিয়ৌপা কৃতজ্ঞতা হারপুয়াউরি। আমারতা আরাকৌ লোকয়ারি থা’গিয়াসেগা, অতা হাবি পুলকরিয়া পিসেদে সংকলন এহানর আরাক খণ্ড আহান ফঙকরানির আশা থাইল ৷
'বপাবপেইর য়ারি' লেরিক এহান পাকরিয়া আমার পাঠকে নুঙেই পেইলে আমার পরিশ্রমহান সার্থক ইতই।