এগত হৌপাত বারো ডাইল, চৌল, ফল পড়ে পড়ে আসে। তারতা চিন্তাহান হমিল। এসাদে কামতে আপাঙ ছাড়া কুংগৌ নাকরবা। কিন্তু, কিহান করত! তা বাজারর খৌ অগত হৌপাত, ফলমূল যেতা পারিন লক্করে লক্করে আনল। কিন্তু ডাইল, খই অতা কিসাদে তুলত! করত করত ইসে লপুকর মাটি। অতার গজে নেড়া উবা ইয়া আসে। সিয়ান ফিঙফিঙ সৌয়িয়া ঘরে আহিল। আপাঙরে আর গালিয়াউ কিতা কানা। পিসর দিন বিয়ানে সিয়ান বারো বাজারে গেলগা। যানার আগে আপাঙরে মাতল— চারে ভাই আপাঙ, মোরতা বারো এপাগা খরচপাতি, ফল ফলারি খানি আনাত যানা লাগের। তি বার্তনহানি করগা। কালিকার দেখিতে নাকরিসকো । - - হাই দাদা, বেরাচেরা নাকরিম। কথা দিলু ঙকখি করিয়া বার্তন করেদিতৌ । হায়ে, তি মোর লৌশিঙপা বানার বেয়কগ নাই। তবে মুঙর গাঙেদে বার্তন নাকরিসগা, হারপিলে, না পাহুরিস, খাদর গাঙ, কলোনি, নুয়ালাম বার্তন করতেই। মুঙর গাঙে নাকরানি, এহান বারে বারে মাতলা আপাঙরে। যিতেগাউ মালকে মুরগত মাঠিয়া মাঠিয়া মাতল— বাবা ছড়াহান না লালুইসকো। মুঙর টেঙারা অগত পাঙ মানুয়ৌ নেই নাযিসগা বুলিয়া বার্তন করাত যারগা আপাঙরে চেয়া থাইলি উবায়া। এগদে বারো কিহান করল আপাঙে? ঙালতো ঙালতো