বুজন মানু এগ থাইল। দারৌ বারহানল আটে আটে খালকরের। রাজা বা রানী লাঙটিয়াগ না ফৌয়সেহা পাউরি উহানে খানি নুয়ারিয়া আসিতা। এতা খালকরিয়া তা হাবিতা পাহুরেসে। পাহিয়া এতা খানির বারহান মুঙে থয়া কিয়াকা নাহেয়া আসিতা— টেইপাঙ মানু অইলাইসতে কুম্বাকাউ কাড়াকাড়ি দিয়া লমকরে বেল্লাইস— এতা কিতা খালকরের । আটতে আটতে কাদাৎ চেপইলগা উবাকা খাংতাকো তার আহিগৎ পড়িল- রাজা লাঙটিয়া উগ ঝুম মারিয়া আসে। অংতাহানে রাজা লাঙটিয়াগ বুলিয়া চিনতে হিন নাসে। গারিগ হাবিরাংত হবা, কচুহানৌ হাবিরাংত তঙাল অসে, পাখহানিয়ৌ হবা অসে, জাঙহানি বুজে হুরু হুরু ফরি দলাগ অয়া বুজেসে। উবা অসেতা হাবিত্ত খানি দুরেই অয়া খেয়য়া। পাই-পরিষ্কার অসেহান দেখলেই উপনি য়াকরের এগ রাজাগ বুলিয়া ৷ রাজা লাঙটিয়াগ দেহানিয়ে বুজন মানু এগ আরাকৌ চিন্তাত পড়িল- রাজাগ আয়া ফৌয়সেহা থাংতে কিয়াকাতে খা নুয়ারিয়া আসিতা। চামহানতে এরেয়া হদাসিগ আগেত্তই। খালকরিয়া কারণহান বিসারেয়া নাপেইল। কাকেইহান তাপইল ৷ বুজন এগরতা লাঙটিয়া এতার গজে বানা আহান হমেইল। কতি নংসাং অইল খানির বারহান দেহিয়া আটিঙ্গাত্ত লামিয়া আয়া খানি নুয়ারিয়া আসি এহান তার দুঃখহান।