এহান নিয়াম হিন। সাহস নিয়াম অনির লগে ঠইগ তালুহানাৎ দেনি লাগের। গুণাধরে এসাদে সেপ আকেইহান বাসেয়া থাইল। নিয়াম মনেইলে আশা থুঙর। গুণাধরর জীবনে ঔসাদে দিন আহান আহিল। মেইপা আগর জীবনে এহান ডাঙর পরীক্ষা আহান, সাধনা আহান যেহানাৎ সফল অইলে সিদ্ধিলাভ বারো ঔ মুহূর্ত উহান জীবনর চরম মুহূর্তহান। থাচিয়ে ঠাংচাই তিলসে দিন আহান তার গাঙেই মানু আগ দৌ অইল। গুণাধরে এ সুযোগ এহান আতেত্ত এরাদেনি নামনেইল। রাতি বারো বাজির মাপা উগৎ আকখুলাগই পিদেসিল ফুতিফালি বেলেয়া তার গারিগ বারো তার ভিটাগ বাধিয়া ঔদিন মরাগ পুড়েসিলা ঔ শ্মশান উহান তালকরে সালইল। ইচুদিনর তার খৌরাংহান থুঙনির কাকেই আহান- যে কাকেই আহানর প্রতি মুহূৰ্ত‍ বিপদ। জানহান পেয়া যিতেগাউ হাটক নেই— কিন্তুমান সফল অইলেতে গুণাধর অজার সমান মেইপা টেইপাঙে নেয়ইতাই। অন্তরগৎ নিয়ামপারা সাহস য়মকরিয়া অজালকেইরাংত যেসাদে হুনেসিল উসাদে করিয়া শ্মশানহানাৎ গিয়া ফৌয়ইলগা। মন্ত্রর গুণে গুণাধরর আহিত শ্মশানহানর যে দৃশ্যহান আয়া বহিলগা উহান টেইপাঙে নেই দৃশ্যহান। শ্মশানহান বুজে যমদূত মাহি বহেসি মৃতাগর দেহাগর বাট পানি মনেয়া। আধারহানাৎ কারে