খানারকা ফুয়াত ফলমাহি, মিষ্টি বারো লজেনচুস লয়া আনে দের। কিন্তু বেয়াপা এগই কুনোদিনৌ শৌগরে তার কাদাত চেপনি নাদিরি। খালকরিরি শৌ এগই হারনাপেয়া লাংকাপ এগরে নাগই আহান করেবেল্লে তা শৌগরে এরে দিতইতা? এ নাগই চিন্তা এহানে তেইরে বিতরেদে লমকরে নেরগা। তেইর আরাক দুঃখ আহান অইলতাই ভূতর মইলকগ বুলিয়া গাঙর কুনো মানু আগ তেইর গরে পারা নাদতারা, তেইর লগে ডরেয়া না টটরতারা। তানুর উগদেউ যানা নাদতারা। তেইর কিতা কিতা আহান অইলে শৌ এগর ভবিষ্যতহান কিহান অইতইতা? এতা কিতা দুঃখই তেই অমাটিক নুঙেইরমা থায়াউ তেইরাং হারৌহান নেই। দিনে দিনে গারিগ কাটাগ অ'যারগা। লেহাউগ মালসিল মেইথঙহান হুকিয়া মাছালি নিকুলানি অকরল। তেইর অংতাহান দেহিয়া আকদিন লাংকাপে নিয়াম মনে হিনপেয়া বানাল আংকরের — অ ঠইগ লেহাউ, কিতারকা তি অমাটিক খালকরুরিতা? দিনে দিনে কাটাগ অ’যাউরিগাতা? কুনো কিতার অভাব অসেথাং? ‘না না। কিত্তাউ নাসে।' তেই বল্লে মুকসি আহানল খুমকরল। - কুনোগই তোরে কিত্তাউ মাতিয়া হিন দিলাখা? – তি থাইতে কুংগই মোরে পরথানির সাহস করতাইতা? ভূত এগই দরে নুয়েইল বেয়াপা এগর দুঃখহান। কি যন্ত্রণাহান আসে