আয়া নিকুলিলগা — আপাংপি, কিয়া হুদ্দা কাদুরিতা? মি তোরে রাহালি করিয়া থাইতৌ। কুনো মানু আগই তোরে আঙুলি বিদেয়া থি -কথা আহান মাতিয়া যানা নুয়ারতাই। তোর খেতিহান করেইতৌ। ধন-পইসা আনেইতৌগা। নুয়ারপানিততৌ জিংতা করতৌ তোমার মালক-পুতকরে। তোরে মি ঠইগততৌ জিঙে বানা পাউরিগ। তি রানীগ অয়া থাইতেই। সুপ না ডরেই। কমলিনীয়েউ দেখল তেই কাদিয়া আর কিতা করত? ভগবানে যেহান করতই উহান বুলিয়া আহির পানি পুসল। সেন্দারমা লাংকাপরে দেখলে মালপা মুকসি আহান দিরি। তা উগ হারৌয়ে থাইব পথ নাপার। তেইরকা বুলিয়া টেঙারাত্ত দারৌ আনেরগা, রাতিহান আল দরের বারো দওয়ার সময়ত হবা করে ধান কাপিয়া মাড়া দের, মাংকলে ধানর বারন আগ হংকরিয়া উগত ধান থদের। প্রয়োজনমতো ধান বানে দের। তেইর প্রয়োজনমতো বাজারেত্ত হৌপাত, ডাইল- খই-থৌ-নুন হাবিতা আনে দেরগা। উতার গজে তেইর ফুতি-ফালি আনে দেরগা। এতার সারুক তেইর বানার মুকসি আহান পানা মনার, লগে তেইর আতে রাধা ফুয়াত ভাত আকচালুক বারো তেংকুত বুজ্জে হৌ পেট বুজিয়া খেয়া হারৌ অনা মনার। লাংকাপ এগই তেইর পুতক সানু এগরেই জবর বানা পার। তারকা কিসিম কিসিমর ফুতি-ফালি, খেলার জিনিস বারো