দৌর সেবাত থেঙইতারা। আটেলপাউ এফির উপায় না পেয়া দৌর বারাদে বুলন দিল। দিন রাতি নামসা-কনক পিদিয়া তুলসীশপার তলে বহের। হরিনাঙ দের। গাঙ গর নুংপাং অইলা। পুলো পুলো আটেলপার কেথক চেইতারাগা। তা বারো আহিগ না ফুকার। মালক-বাপক পুতকর ভাবহান দেহিয়া আহির পানি মেইথঙে বহিতারা শৌগ কিহান অইলতা বুলিয়া। যেতাউ অক পুতকগ নাই। এগদে তাতে দৌ নিংকরেরতা কোনো তত্ত্ব হারপানি বা ভজনরকা নাগই, ভিতর ভিতরেদে দৌরাং রুপা মাগেরতা কত লিশিং। কতি ডাহের কাদের দৌয়ে রুপা দেনার য়ারি নেই। এসাদে হুদ্দা দৌ হমাদিলে রুপা আহিতইতা? দৌয়ে কুরাংকার রুপা দিতাইতা! ইমে মানুহান চপকো মালঠেপে বুজলা। আটেলপারতা গারিগত ডর আহান হমেইল, তার মনর য়ারিহান হারপেইলে মাহা দশা আহান অইব ডরে উঠিল। মাতের, মানুর হাদিত ভজন নার। সালইল বনর পথেদে, নির্জন ফাম আহানাত। যিতেগা যিতেগা গাঙহান লালয়া টেঙারাগরমা ফৌয়ইলগা। আসাংপা টেঙারাগ। চারিবারা বনজঙ্গলে বুজেসে। নিংকরের, এহানাই ঠিক ফামহান। এপেইত ঈশ্বরভজনহান হবা অইব। তা থেঙইল ভজনে। দুরেইর টেঙারাগরমা আয়া ডাঙর কামর সিজিল আহান লেপকরল। আগেদে লোভহান সামালানি নারিয়া দৌরাং তাংখা