আধারহানাত আসুলানি অকরল বাঘ উগরে। ঘরে আনিয়া গুরুকলগর খুটা আগত হবা করে বাদ্দিয়া গুমজানিত গেলগা। ঔদিনকার হিনে তা খানি ডিলয়া উঠিল। বিয়ান পরে ঘরগিথানক উগই উঠান হুরিয়া গুরুকলগর বারাদে চেইতে দেহিরি বাঘ আগ খুটাগত বাদ্দিয়া থসি। ডরহানে তেই চিকারি আগ দিল। বুজন উগ খাং লাগিয়া আংকরের কিহান অসেতা? তেই মাতিরি কলগত কিগ বাদ্দিয়া থসততা? তা মাতের- কিয়াকা! মোর চিতারা বলডাগ! তেই ডাহিরি চেয়া যাগা বুলিয়া। তা উঠিয়া গুরুকলগর বারাদে চেইতে জন্তু উগ দেহিয়া আহিগি পাকদিয়া থাইল, না জিপের। তা ডরহানে নিক্করিয়া বাঘগর গজহানাত গিয়া পড়িলগা। বাঘ উগরতা এবাকাউ রাতিকার ডরহান না বাগেসে। কুনো লরালরি নেই ডরহানে ইঙগ অয়া থাইল। ঘরগিথানকর চিকারিগ হুনিয়াউ হুরকাঙ বাঘগর গজহানাত গুমজাসে, উঠানির পাংকাল নেই। পৌ এহান চারিবারা সিলইল। রাজারাং পৌহান পড়িলগা। রাজা হারৌহানে তার দেশহানাত এসাদে পাংকালপাতা থাগেসিগাহান নিজর আহিগিল দেহানিরকা আহিল। বাঘগর গজে এসাদে গুমজানি এহান দেহিয়া রাজার হারৌ কুংগই দেহের। লগে লগে খুত্তল দেনার সিজিল করেদিল। রাজাই তার ঘরবাড়ি হাবি দালান হংকরেদেনার য়াথাং দিল।