এতারতা খালপাল আহান হমেইল। বাণিজ্যত্ত হাবি ফিরিয়া আহানি বিত্তাউ অইলাগা। রুপা পয়সা হাবি বনকরে দিয়াদিতাই— এসাদে খালপাল আহানে জিগর সাদে ডহিয়া যিতারাগা। বারো বাসকিরাং গিয়া বুদ্ধি আহান আংকরতারা কিহান করানিহান বুলিয়া। দশোমতিরে বার চালেয়া তেনুয়াগ হংকরতই বুল্ল। বারি আকচিলা মন্ত্রহান দিয়া দশোমতির চুলে বাধে দেনার লগে লগে দশোমতি পাহিয়াগ অয়া ফরদিয়া গেলিগা। এগদে সাতগ বেয়ক বনকরকা খুত্তল, লামক কিতাল আয়া ঘরে ফৌয়য়া বনকরে ডাকতারা। বনকর দেহা নেই। এতাই খানি আহান সন্দেহ করিয়া যার যার মইলক-লকেই উতারে গুম গুম বাকুরি দেনা অকরলা। বাসকিরে আংকরতারা— দশোমতি কই? সময় উহানাত পিঠির গাছজারে থায়া তেনুয়া আগই এলা আহান দের- "পিছর ঘরর বাসকিয়ে দিল মোরে লাংলা, মুরর মাঝে কবচ দিয়া অইলু বনর তেনুয়া।" খুল্লা বেয়ক এগ পিঠির থংচিলেদে বয়া কাদেরতা। খাংতা তেনুয়া এগর এলাহান হুনিয়া দাবদিয়া হেরৌ বেয়ক-লকেই উতারে ডাকদিয়া এলা উহান হুনুয়েইল। লগে লগে হাবিয়ে তিলয়া তেনুয়া উগরে ধরলা। ধরিয়া মুরগত আছে বারি উগ ছিড়িয়া বেলাদিলা হানতে মানুগ অইলি। হাবিয়ে আকসাটে আংকরতারা— 'মা, তিতে এসাদে কিয়া?'