আগই দশোমতিরে থক্ক ঠেলাদিয়া গাহালিগত বরেয়া গুম গুম চিড়ার লগে দুহে বেল্লা। দুহিয়া দশোমতিরে মারেবেল্লা। এবাকাতে কিহান করতা? কুরাং বেলতাগা উহানল খালকরতারা। ত্বরা করে হাপেই আগত তুলিয়া নিয়া হাপেইগল পহুরিগর কুনাগত বেলেয়া আহিলাগা। যেপেই দশোমতিরে মারিয়া বেল্লা উপেই থাম্পাল আকজার উঠিল। কতমাহা পিছেদে জেঠা বেয়ক উগ ঘরে আহিতেতে পহুরিগর কুনগত দেহেরতা কতি হবা থাম্পালজার। থাম্পাল শাতয়া গতগই চারিগদে আমোদিত করিয়া থছে। জেঠা বেয়কে খালকরের— উঃ এগ শৌগরকা নিলেগাতে জবর হারৌ অইতই। এহান খালকরিয়া লগে আনেছে জিনিস উতা আগদে থয়া থাম্পাল ছিড়াত লামেরগাতা। হানতে থাম্পাল উগ লরের বারো এলা আহান দের। দেরতা কিহান বুল্লে "না সকই না সকই। দশোমতি মরলি, না সকই না সকই।" হাঃ এহানতে কিহানে। না সকই বুল্লেউ খানি হেকঠেলেয়া জারহানর গুরিগত্ত ধরিয়া আহুল দিতেতে গুরিগদে কলয়া দশোমতি আহিলি। 'হাঃ মা তিতে কিয়া এপেই?' 'হাই, মাইজমদাই আনল চাকচাবিহানর সালে বৌজিগাসিয়ে চিড়ার লগে দুহিয়া এপেই বেল্লাগাতা', বুলিয়া দশোমতিয়ে মাতল। 'হুঃ, হাত হাত', বুলিয়া হিনাদিয়া ঘরে দশোমতিরে নিলগা। দশোমতিরে