ছাগিশৌগরে লপুকে বেলেয়া হেজিত গগারা চেলনি পারর জন এগৌ মনুষ্যগকো! দুলাল খুড়ার ইন্দল ঔগ তেল্লাম ছাগির সাঙগত দাবদিয়া দেখল ছাগিশৌগ আসে। ‘খুড়া। আমার ছাগিশৌগ উরে কলগত মালকর কাদাত ঘুমজিয়া আসে। মি নিজে মালকরে শৌগরে সেইক্‌খাত বাদ্দেসুগ৷' তেই মাতল। ‘হাঃ স্বয়ং মোর নয়ন দ্বিয়গিল দেখলুতা তোমার ছাগিশৌগরে, বিশ্বাস নাকরলে এরে চেই' বুলিয়া আচালাহান আংকরিয়া চৌয়েইতেই ক্ষেম ইপুয়ে নিজে বারো দুলাল খুড়াগাসিয়ে দেখতারাতা গোবর আকচাকা! ‘হাঃ অন্থকপাহানকো! মি মিছাগতহে পড়লু। নঙেই রাতি এহানাত তেত্তগ অয়া ধরিয়া আনলু ছাগিশৌগ কুংবেদে মাঙইলতা?' ক্ষেম ইপুয়ে এতা বুলে বুলে ঠক ঠক নিক্করানি অকরল। দুলাল খুড়াই সিচ্চিল ঘটনাহান হারপেইলতা নাগই, ক্ষেম ইপুয়ে স্বয়ং হারপেইল— তারে থঙহানর হেবানিয়া লামচিক ঔগই ধরেসেহান অসে। ক্ষেম ইপু হরিনাঙ সলকরে সলকরে পাহাৎ অয়া ডম্ম মাটিত পড়িয়া থতাদে কলপুক নিকালানি অকরল। দুলাল খুড়াগাসির হেইমাকহানে মুরগত পানি ডালানিয়ে কিতাই সেবাসেবিত লাগলা।