চুনা। অওয়াং-খা ইয়া ঘর পারেঙ ইয়া পড়িসি। উঠানে উঠানে আটতারা। পিসর গাঙে নুয়ালাম, অওয়াঙেদে খাইরগাঙ, খা-বারাদে কলোনি আহান লালয়া বাজার আহান বহিতারা গাটর পারে। কিন্তু মুঙেদের টেঙারা এগর য়ারি নাদলেই হারৌ তাঙি হাবি। এরে উচপা টেঙারা এই বিয়ানর বেলির মিঙাল গাঙে পড়ানি নাদের। পিসে বেলিগ কাইলে পড়ের মিঙালহান, অহানে টেঙারা এগরে কুষ্ঠিথঙপা চূড়ামণি টেঙারাগ বুলতারা। এগদে আপাঙগাসির গাঙ অহানরে মণিচূড়া গাঙ... থাক এপাগা আসল য়ারিহাত যিকগা। আপাঙরে বারেদে দেখতেতে জবর চুনা। তেবো তার লগে থাইবা অগই হারপানি। বেয়ক সিয়ানেউ জবর বানা পার তারে। মালকতে ইমে মালক নাই ৷ তেইরাংতে তেইর কানা, লেঙ্গারা, আওয়া শৌগৌ মণিমুক্তাগ। এগদে আপাঙ ইলতাই আহান মাততে আহান করেরগ। আকমাউ কিহান ইসে, সিয়ান এগ তাপ উঠিসে। এগদে ধান মজিয়া কেলয়া পড়ে যারগা। ঔ সময়ততে এপাগার অসারে মেইপা, ডাক্তর আসিলা থাং? তাপ অতাউ কি যেইসেই তাপ থাং? পচাতাপ, কালাতাপ, বসন্ত— আকমাউ ধরলে হাপ্তাহান পনরো দিন ফামে নাপয়া আড়গই চামহানে ইয়া থাইলা। আপাঙরে কাদে কাদে মালকে মাতিরি— অ আপাঙ, ধানগি লপুকে জঙিয়া মাঙর। এগদে তোর দাদাউ ফামে নাপয়া