গারিগত হমিল। জ্বালাই পোড়াই হিনহানে দিশাহারা ইয়া হিঞ্চাপি অগ নিজর রূপ ধরল! তেইর ভয়ানক সাকৃতি মূর্তি এগ দেখিয়া হাবিয়ে ডরপা বেল্লা! তেবো সিয়ানে মাতল- ডরপিয়া কানা নেই। ছালি আনো। নিঙল মৌনাহা বুড়া বুড়ি হাবিয়ে পাঙ্গিনিমতো ছালিয়ৌ আনিসিলা। অতার গজে হাবিয়ে তুলিয়া হিঞ্চাপি এগরে বেলিয়া যেগই যেসাদে পারতারা সেদানি অকরলা। ছালি নাদলে হিঞ্চাপির রকত মাটিত পড়লে লিশিং লিশিং হিঞ্চাপি জরম ইতারা। অহানে দ্বিহৌ বস্তা ছালি কালি রাতিয়েই যোগার করিসিগ! করতে করতে হিঞ্চাপি এগর চিকারি খামুইল। তেই বিকট রূপহান ধরিয়াই মরলি। গাঙর মানু হাবি হারৌহানে সিয়ানরে গজেদে তুলিয়া ফালদে ফালদে নাছানি অকরলা। এসাদে করিয়া গাঙ গাঙর হাবি মানুয়ৌ হিঞ্চাপির ডরেত্ত মুক্তি পেইলা। আপাঙ-সিয়ানর কীর্তি গাঙ গাঙে সিতারল। তাঙি হাবি নুঙি ইয়া থাইলা ।