আপাঙে সিয়ানে বেইবুনিহান। মালক বুড়া ইলি। দৌ-দুকে মনহান তেইরতা। আকদিন পিতক দ্বিয়গিরে ডাহিয়া মাতিরি— বাবা আসিরাই, তোর বাপকতে নংসাং ইলনাই দৌ ইলতা। মিতে থা পড়লুগা সংসারর মায়া এরাদে নারিয়া। অতা ইয়া মোর মনর জবর খৌরাংহান, এমারি ধানগি লক্করিয়া লমিলে বৈষ্ণবসেবা আহান করানির । পাপ কিতা খানি ককিবতা না কিতা! তুমি কিহান মাতরাইতা? হাই ইমা! ইমাই যেহান মাততেই অহান ইতই। ধানতে কাপিয়া মারাউ লমিল। বারনে বরিয়াউ বৈষ্ণবসেবাহান করিক। কিহান আপাঙ তিয়ৌ মাতবেনাই খানি - সিয়ানে বেয়ক আপাঙরে মাতল। হাই হাই ইমা। তি চিন্তা নাকরিস। আমি দাদাই মিয়ে আসিনাই। করতাঙাই বৈষ্ণবসেবাহান। করতে করতে আহিল দিনহান। কালি থায়া পৌরু সাগলসেনর দিনে পড়িসে বৈষ্ণবসেবার দিনহান। আপাঙতে ইমে আপাঙ নাই অরেতে। বেয়ক সিয়ানে হাবি হিসাব কিতা করিয়া খরচর ফর্দহান হংকরল। আপাঙরে মাতল, বেলিগ থা থাইতে বাজারর মাল ঘরে কাকরানি লাগতই। সেন্দাহান ইলে গাটর পারেদে যানা নাইব, বিপদ আসে। আপাঙে মাতের — কিতার বিপদ বারো দাদা, মিতে আসুনাই-এ! হায়ে তিতে আসত হাই। তেবো হাত আর না ডিলকরি কাকেইহান খানি ডিগল কর ।