আনিয়া দিলকো পুরি রাজাগিরিয়ে এগরে না বানাপেয়া উল্টা পাইজনগল বারেয়া কাদাত্ত খেদের। রাজাগিরির এ বেবার এহান দেহিয়া মন্ত্রী, সভাসদ এতা নুঙেই নাপেইলেউ কুনোগয়ৌ রাজাগিরিরে কিত্তাউ মাতানি নুয়ারতারা। আকদিন রাজদরবারে বহেসি উবাকা বান্দর উগই রাজাগিরির আতহানাৎ হুনার মুদ্রা আহান আনিয়া দিলহাতাই নিক্কাকার ডেকি রাজাগিরিয়ে বান্দর উগরে পাইজনর বারি আহান দিল ৷ বুড়া মন্ত্রী আগ আসিল উগ রাজাগিরির বেবার উহান দেহিয়া নুঙেই নাপেয়া উদিন মাতে বেল— রাজাগিরি, লালইলেউ ঙাক্করেদিবাং- কথা চুটি আহান মাতানির য়াথাং থাইলেতে মাতানি মনাউরি। রাজাই মাতল, - - - য়াথাং দিলু। মাত। রাজাগিরি। বান্দর এগই কতি হিনপেয়া নিক্কাকার হুনার মুদ্রা আকেইহান বিসারেয়া আনিয়া রাজাগিরির অর্থভাণ্ডারগ চাংখল করানিৎ পাংলাক করের। এগর প্রভুভক্তি এহান বাখান করিল মাটিকহান। এগরে বানা নাপেয়া উল্টা পাইজনর বারি আকেইহান দিয়া খেদিয়ার এহান কিয়াকা হার নাপেইলু । রাজাগিরি ইচুদিন এ কথা উহান আংকরকা বুলিয়া আসে। বুড়া মন্ত্রী এগর কথা এহান হুনিয়া রাজাগিরি মুকসি আহান দিয়া মাতল— মন্ত্রী, বান্দর উগরে কিলাউরি বুলিয়া হিনপার থাং? –