ঠইগ গারিগ বেলেয়া যিতইগা। তি এগর সৎকার নাকরিস। বনর জীবজন্তুয়ে খেইবাতা। তি মোরাং সাগি কর। হেয়কে কথাহান বিশ্বাস নাকরিয়া থক্ক সাগি করল। লেহাউয়ে মাতানি অকরল— পইলা ইনের য়ারিহান দিং। ঠুনিংশা আহান বেলেয়া মাতিরি— মোর হৌরিয়কর আত্মাগই নিকুলিয়া যিতেগা তেইর গারিগরে মাতেসিলতা, হে বুড়ি কাঞ্চুপি, কঞ্জিসহান বারো মনহান সাকতি আকয়া কুনোদিন তোরাংত হবা কথা আহান, হরিনাম আহান হুনে নুয়ারলু। আজিতে এরে যাউরিগা সাঙয়া। উতা বুলিয়া মোর হৌরিয়কর গারিগরে জাংদাল দিয়া গেলগাতা। উহান দেহিয়া হুনিয়া মি আহা বেল্লুতা। বারো গাঙর বুড়ি উগ ধর্মচেল্পিগ আসিলি থাংতে তেইর আত্মা উগই যানা নামনেয়া তেইরে কলকরে ধরিয়া রৌ মেলে মেলে কাদন আহান দেসিল। তার কাদন উহান দেহিয়া মি এগই জারে নুয়ারিয়া কাদলুতা। কথা এহানি খুমকরতে খুমকরতে তেইর ঠইগ নিকুলিয়া গেলগা। তেইর গারিগ কলাপাতা উহানাত ডিগলগ অইল। হেয়ক এগই নুংপাঙ অয়া 'হইম্মারো, মিতে কিহান করলুতা' বুলিয়া মরা দেহ উগ দরিয়া রৌ মেলিয়া কাদন আহান দিল। সাগি করেসিল হানতে দেহা উগত ফুলতুলসী কাৎকরিয়া উসাদে বেলেয়া গরেদে গেলগা। মরা উগ যেতা যেতাই খেইলা ঔ