গাঙ আহানাত লেইরাপা হেইমাক আহান আসিলাতা। শৌ নাপেয়া থাইতে থাইতে কত দৌদুক নিংকরিয়া তানু নিঙলশৌ আগ পেইলা। তেই জোনাকহান পারা সাত উহান দেহিয়া ষষ্ঠীর দিন উহান বামুনগই নাঙহান থদিল লেহাউ। বাপক মালকতে মানুর খেতিত দিনহান লপুকে থাইতারাগা। নিঙলশৌ এগ আকখুলিগ গরে থাইরি। তেই লগে খেলাকুরি আগ বিসারতে বিসারতে বুদ্ধি আহান নিকালেয়া ফুতির তেনাল পুতুল দুগ হংকরল। উগিরে তেই হমাজকহান হংকরিয়া নিজর মনর কথা হাবি ফুকারেইরি। অনেক সময় হারৌ অয়া তানুরে বুকগত চেপকরিয়া দরিরি, অনেক সময় য়ারৌ করলকুরি দুরেই করিরি। হাদি হাদিত তেয়ে তেয়ে ফাগির য়ারি দিয়া খলপি খলক আহেইরি, হাদি হাদিত তেয়ে তেয়ে হাপকো ফুলিয়া থাইরি। তানুর লগে গেটি খেলেইরি। গেটিল ভাত রাদিয়া খৌয়েইরি। দামান বিসারেয়া আনিয়া উতার বিয়া দেইরি। এসাদে খেলতে কিতা কিতা করতে তেইর সময় কুংগদে যারগা উহান হারনাপেইরি। অইতে অইতে তেই বিয়ার লাক অইলিগা। গাঙর মুনিশৌ এতাই তেইর গজে আহি বেলানি অকরলা। বাপকে লিমগ হারপেয়া পিঠির গাঙর নুঙেইপা, চরিত হবা মুনিশৌ আগর লগে তেইর বিয়াহান লেপকরল। এখুরুমতে লেহাউরতা তেইর হমাজক এগিরেল সমস্যা দেহাদিল।