গজে যেহান অন্যায়হান অসে উহানরকা ক্ষমা চাউরি। আমি হাবিহানৌ তোর প্রজা। আমারে ঙাক্করে দে। মহারাজার ভক্তি এহান হুনিয়া পাহাংপা গিরক হারৌ অইল। আফাইহানর পানি লামানি অকরল। লকতাকর পানিহান ইঞ্চিক চিকইল। সটুয়াল, কটোয়াল, সিবেই এতাই পানিহানাত্ত মরাগর মচা উহান নিকালেয়া আনলাগা। মানু দিয়াপেঠেয়া পাহাংপার মৌয়েই জিপুতরে আনুয়েইল। উতার পিসেদে পাহাংপার দেহাগ বিধানমতে দাহ করিয়া শ্রাদ্ধকর্ম করলা। পাহাংপা গিরক যেপেইত থায়া দৌ অসিলগা উপেইত কঙ আগ হংকরে দিয়া তার পুতকরে ঔ লাম উহানর রাজাগ পালকরে দিল । এহান জনবিশ্বাস আহান যে পাহাংপা গিরক অইলতাই আজা বক্রবাহনর সপ্তম অবতারগ। জৈমিনী মহাভারতে উল্লেখিত অশ্বমেধ যজ্ঞর সময়ত তৃতীয় পাণ্ডব অর্জুনরে পুতক বক্রবাহনে যুদ্ধত মারেসিল। অর্জুনর মরা গারি উগ দেহিয়া মালক চিত্রাঙ্গদাই পুতকরে শিরাপ দেসিলি যে তারেউ তার হাতখুরুম জনমে নিজর পুতকে মারতই। পাহাংপা অইলতাই বক্রবাহনর হাতখুরুমকার বারো লমইলগা অবতারহান। তার পুতকে হাতখুরুম মারানিয়ে মালকর শিরাপেত্ত মুক্ত অইল।