সাউকারহানল মাতিরি— অবাই দাদা, উহানলৌ চিন্তা কররতা। মিকুপহানাত রাদিয়া লমকরতৌ। মাংকলহানাত আসে পিড়া উহানাত ব। লাংকাপ এগ ঠিক দুয়ারহানর কাদাত পিড়াহান আসুলদিয়া বহিল। সাকতি দৌগ থাংতে গরে বিতরেউ হমা নারের। বেয়াপা এগই দণ্ডহানাত ভাত লমকরিয়া কুলা আহানাত ভাত হাজেয়া দিল বারো তেংকুত আগত হৌ ডালিয়া দিল। তা মিকুপহানাত উতা খেয়া হদেয়া তেইরে মাতেয়া গেলগা। ঔদিনকার পিসেদেত্ত লাংকাপ এগ নিক্কা সেন্দাহান লালইবতাই কমলিনীর মাংকলে আয়া ফৌয়রগা বারো ভাত মাগের। নাইলে কিতাকিতি মাগের। তেয়ৌ না বুলে নারিরি কিন্তু তার দাবর এগৌ খাংকরে নারিরি। উতার গজে শৌ এগরে কুম্বাকা ক্ষতি করতই সাদ বুলিয়া উঙয়া থাইরি। অইতে অইতে আকদিনতে তেই বুদ্ধি আহান খালকরল। ভাত রাধানির সময়ত নিক্কা তেই চাকামর বেড়র ডালিয়াহানাত কান আগ হংকরানি অকরল। আকদিন রাতি লাংকাপরে ভাত দিল আর তা খানাত বইতেই তেই শৌগ খকহানাত দিয়া কান উগদে দাপদিয়া নিকুলিয়া গেলিগা। দাপদে দাপদে পিঠির গাঙর মুরুশি উগর আরাংগ লালইলি উবাকা লাংকাপে হারপেইল। আতহান সালকরিয়া তেইরে দরিং বুলতে দরে নারল। কমলিনী মাংকলহানাত ডমক পড়লিগা— 'মরে জিংতা