দেশ আহানাততে মালক পুতক আহান আছিলাতা। পুতক উগতে কতিয়ৌ আলিয়া অছে বুল্লে ঘুমেত্ত উঠতে তারতা বারোটা বাজের। হাপ্তাহানাত আকরুম হিনার। মালকে হারদিন নিবুরিহানর ডেকি তারে গালেয়া থাইরি। তারতা গারিগত সুপ না লাগের। আকদিনতে কিহান নিংকরিয়া মাছি মারানির উমেই আহান হংকরিয়া পুতক এগ বহিলতা। খেলানিহান পারা করে মাছি এতা মারতে মারতে হাজার আহান মাছি মারেবেল্ল। মারিয়া হদেয়া মালকরে মাতেরতা— ইমা তি রাজারাং যাগা। গিয়া মাতবেগাতা— ‘মহারাজা মোর পুতকে হাজার আহান জন্তু মারেবেল।' মালকে পুতকর কথাহান ইলয়া রাজারাং গেলিগা। রাজারাং হাজার আহান জন্তু মারানির কথাহান মাততেই রাজাই খাং লাগিল। ডর পেইলেউ মনে মনে এগরে পরীক্ষা করিয়া কামে লাগানির চিন্তা আহান রাজাই করল। বেয়াপা এগরে খানি মানি রুপা দিয়া রাজাই মাতলতা — হে গিথানক, দিলু এতাল যাগা গিয়া তোরপুতকরে দিয়াঠোদেগা বারো হুন আজিত্ত পুরি তোর পুকর নাঙহান থইলু ‘হাজারিমাল'। বেয়াপা এগ যানার পিছেই রাজাই জয়ডঙ্কাগ বাজেয়া সিবেই কিতা ডাকল। ডাহিয়া আদেশ দিল হাজারিমালরে সসম্মানে রাজার কন্নুঙে আনানিরকা। আদেশহান ইলয়া হাজারিমালরে কন্নুঙে