দেশ আহানাত চাউবা বুলিয়া আপাঙ আগ আছিলতা। এগর আপাঙ এহানর সাদে আর কুনো আপাঙ গাঙ দেশে নেই। আপাঙরমা তাই হাব্বিরে জিঙেছে। মালকে উহানল চাউবারকা নিয়াম খালকরিরি, এগ কিসাদে জনম এহান কাটেইতইগ বুলিয়া ৷ আকদিনতে চাউবারকা মালকে নিঙল চানাত নিকুল্লিতা। হবা বহক আগ ঘরে বরানি মনেইরি। সাতেদে যেমন হবা অনি উসাদে গুণহানৌ হবা অনি। লেয়ইতেগা হব্বা নিঙল আগ চেয়া চাউবারকা লুহোঙ করিয়া আনেদিলগা। মইলকগ পেয়া চাউবা আরাকৌ আপাঙহান জবর অইল বুলিয়া মালকে খালকরিরি। আকদিন মালকে ডাহিয়া মাতিরি- অ চাউবা হুন, মানুয়েউ মাছ ধরতারা, তিয়ৌ মাছগুলি ধরগানে? যাউরিগা ইমা— বুলিয়া চাউবাই পারন আগল যিতেগা যিতেগা ডাঙর গাছ আকজারে কায়া পারনগ পাতানির ফাম আহান পেইলগা। ডেঙ দুগর হাদিত পারনগ হবাকো ডুফা দিয়া পাতল। মনে মনে নিংকরের আজিকার মোর পারন এগ পাতলু ফাম এহানতে কুনোগই নাউ পেইতাই— পিছেদে আয়া পারনগ তুলতৌ বুলিয়া ঘরে গেলগা । ঠিক বেলিটিকগ অইল, চিকচিকি রইদহান পড়েছে। চিল আগ সৌকরানিহানে খানি চিকইঙগা বুলিয়া ফাম আহান বিসারারতা। বিসারতে বিসারতে চিল এগই আপাঙপা চাউবাই গাছজারে পাতিয়া গেছেগা পারন এগ দেখল। দেহানিয়ে