মানুর গত আহের বুলিয়া তেইরে দুরেই করলা। খুলি নিঙল উগ দুঃখই আকয়া জুরে জুরে কাদিরি। না এপেই না হৌপেই তেই যানার ফাম নেই। জবর উরাহিচি জীবন আহান তেইরতা আরম্ভ অইল। এগদে ছদ্মবেশী রাজার পুতক উগরে রাজাই রাজ্যর অর্ধেক বাগানহান দিয়াদিল। উতাল ঘরে গেলগা। তা ঘরে গিয়া আরাকৌ লুহোঙ আহান করল। আকদিনতে পাহুরিয়া মলগর তলে বাশি উগ থয়া বুলাত গেলগা। মইলকে ফামহান পারতেতে উগ পেয়া ফু আহান দিল থাংতে স্বৰ্গত্ত পইলাকার মইলক উগ ত্বরাকো আহিলিতা। আয়া চেইরি থাংতে তেইর হেয়কতে নাগই বেয়াপা আগই রহেইরি। কান্থি এহানে দিল থাপড়হান মরে পড়লিগা। তেই বেলাদিয়া গেলিগা। রাজার পুতক উগ বুলাত্ত আয়া চারহা থাংতে বিপরীত কাণ্ডহান। কাদাত বাশি উগ পড়িয়া আছে। তা নিংশিং অইল। ফু আহান দেনাই বারো আহিলি। আংকরল, তি মাতে পারতেইতা কিতা অয়া এসাদে অইলিতা তেই। হাই কিয়া মোরে তেইতে ডাকতইতা, মি মারলুতা। তেইতে হার নাপাছে, মি পাহুরিয়া বাশিগ বেলেয়া গিয়া পড়েছুগাতা। তেইরে জিংতা করেছে নাইলে তোরে আজিত্ত আর যানা নাদতৌ। পিছে পইলাকার মইলক উগই জিংতা করেদিল। মইলক দ্বিয়গির মাঝে পরিচয় করেদিয়া নুঙেই হারৌ অয়া থাইলা।