জেলা উগই ‘খুড়া' বুলিয়া ডাকদিয়া মাতল— আমার শৌর বাপক উগ বাজারে গেসেগা। পাহুরিয়া নুন নামাতেসু, হিনপেইলেউ খানিক্করে বাগাদিসনে। বুজন উগ লাহাংহানাত কথাহানি হুনের, মানুগতে নাদেহের। তা চিংনা চিংনি অয়া মাতল— কুংগ মাতুরিগ নাউ দেখলু, হার-বৌ নাপেইলু। কারে কিতা মাত্তু? শয়তান জেলা উগ টেইপাঙ মানুর বেয়াপার বেশহানল দেহা দিয়া মাতল— হাই, আমিতে শয়তান না। গাছ এ জারর তলে গর হংকরিয়া শৌজিপুতল আসিতা। হানতে আমার বুজন উগ বাজারে গিয়াপড়িলগা। তারাং পাহুরিয়া নুন নামাতেসুতা। হিনপেইলেউ মাতেদিস এনে। পথগৎ উবা অয়া বুজন উগই মাতের- মিতে তারে কিসাদে চিনতৌ? সুপকরেউ না দেহেসু মানুগতে! তেই মাতল— ইমে বাজারহানাত যেপেইত ভিড়গ জবর অইতই, ঔপেইত, হাবি মানুরাংত আত আহান দেড় আত উচকরে দেখতেই ঔগ। তারাং তোর গরর মানুগই নুন নেনারকা মাতল বুলেদিস। খুড়াই আলইতে এগদে হমেয়া যিসগা, কিতাকিতি খানি নিবেগাতা । , বুজন উগ হারৌ হারৌ অয়া বাজারে গেলগা। পইসার অভাবে তারতা খরচহান কম। নুন, হাওয়া, থৌ, পানা, গুয়া খানি খানি খরচ করল। এফির পথর পৌহান বাগাদেনিরকা শয়তান উগরে বিসারানি অকরল। চেইতে চেইতে মাছর আটিত ফৌয়ইলগা।