এগই বাঘ এগর গজে কায়া বয়া থাইল। খানার ওয়ামাহানে বারো দাপদানির বারাদে অয়া বাঘ এগই কিত্তা আহান হার নাপেইল। সিংনার আলিগ পানার আগ উহানাত গগা রাজা এগই চংকরে ফালদিয়া আলিগত কায়া বয়া থাইল। বাঘ এগই মরিং পড়িং দাপদিয়া আয়া আলিগ লালইং বুলতেই গগা রাজা এগই মাতের- হা! ভাগিনা, তিতে এব্বাকা আহরতা? বাঘ এগই মিতে নিংশা মাঙয়া দাপদিয়া আহৌরিগ বুলিয়া মাতের। গগা রাজা এগই বারো মাতের— মিতে নংসাং অইলনা আহেছুগ। উতা বুল্ল হানতে বাঘ এগই দাপ সিংনাহান নুয়ারিয়া খা নুয়ারল নাই। আরাক কৌশল আহান নিকালেয়া বাঘ এগই মাতের উতাইলেতে মামা আরাক সিংনা আহান দিক বুলিয়া। গগা রাজা এগয়ৌ কিসাদে সিংনাহান বুলিয়া আংকরের। বাঘ এগই মাতের — রহানি সিংনা। দ্বিয়গিয়ে য়াকরা-য়াকরি দিয়া দিন আহান লেপকরিয়া বাঘগ বনে গেলগা, গগা রাজাউ ঘরে গেলগা। গগা রাজা এগই ঘরে আয়া দুনিয়া এহানর গগা এতা হাব্বিরে মাতলগা। গগা এতাউ রাজাগই মাতল বুলিয়া নাকরানি নেই। লেপকরেছিলা দিন এহানাত হাব্বিহান আইলা। বাঘ এগ আহানির আগে হাব্বিহান যার-যারির গাতে হমা হমা থাইলা। গগা রাজা বারো বাঘগ থাইতাই ফাম এহান বেরি দিয়া কই কই অয়া গগা এতা থাইলা।